10. bekkur tínir rusl

Í gær fóru nemendur 10. bekkjar Sunnulækjarskóla út að tína rusl í bænum. 

Þeir tíndu rusl meðfram nokkrum götum á Selfossi og af nógu var að taka.  Framtakið er hluti af fjáröflun fyrir skólaferðalagið sem foreldratenglar í 10. bekk skipuleggja.  Árborg greiðir nemendum fyrir verkið og rennur peningurinn í útskriftarferð hópsins í vor.

.

Útikennsla í heimilisfræði

María Maronsdóttir heimilisfræðikennari hefur mikinn áhuga á því að vera með útikennslu í heimilisfræði og hefur sótt námsskeið í útieldun.

Sunnulækjarskóli fékk í dag afhenta glæsilega útieldunargrind frá fimm nemendum skólans. Við þökkum Kötlu Sif, Ingu Jónu, Söru, Styrmi og Guðrúnu Ástu kærlega fyrir þessa gjöf sem afi þeirra Sigurður Grímsson smíðaði.

Útieldunargrindin mun gefa okkur mikla möguleika til þess að auka fjölbreytileika í heimilisfræðikennslu og allri útikennslu.

Uppskeruhátíð – markaður hjá 8.bekk

Í vetur hafa krakkarnir í 8 bekk unnið að verkefninu “Markaðurinn”, samvinnuverkefni  í textíl og smíði, þar sem nemendur kynnast ferlinu frá hugmynd að framleiðslu vöru.

Krakkarnir  hafa unnið hörðum höndum að framleiðslunni í sínu fyrirtæki og svo var afraksturinn boðinn til sölu á markaði í skólanum.

Einnig settu krakkarnir upp kaffihús og seldu kaffi, djús og ljúffengar vöfflur.

Nemendur Sunnulækjarskóla stóðu sig frábærlega í Skólaþríþraut FRÍ

Úrslitakeppni Skólaþríþrautar fór fram í frjálsíþróttahöllinni í Laugardal, laugardaginn 5. maí. Sjö nemendur Sunnulækjarskóla höfðu unnið sér inn þátttökurétt eftir undankeppni í íþróttatímum. Sex nemendur mættu svo í höllina, Perla Sævarsdóttir, Jón Þór Sveinsson, Pétur Már Sigurðsson, Skúli Darri Skúlason og Valgarður Uni Arnarsson öll í 6. bekk, Alma Rún Franzdóttir í 7. bekk en því miður komst Gabríel Werner Guðmundsson 7. bekk ekki á úrslitakeppnina.

Krakkarnir stóðu sig vægast sagt frábærlega og náðu þriðja sætinu í heildarstigakeppni skólanna. Perla hljóp á frábærum tíma í 60 m spretthlaupi og náði 2.-3. bestum tíma í 6. bekk stelpur og Alma Rún bætti sig bæði í hástökki og kúluvarpi. Pétur Már og Valgarður Uni voru í 1. og 2. sæti í hástökki stráka í 6. bekk og Pétur Már varð einnig þriðji í kúluvarpi og í heildarstigakeppninni í þríþrautakeppninni sjálfri. Strákarnir í 6. bekk, Jón Þór, Pétur Már, Skúli Darri og Valgarður Uni  gerðu sér svo lítið fyrir og sigruðu heildarstigakeppnina í 6. bekk stráka.

 Sunnlensk börn af HSK svæðinu stóðu sig mjög vel á mótinu og unnu rúmlega helming einstaklingsverðlaunanna. Nánari úrslit af mótinu má finna á slóðinni: http://mot.fri.is/cgi-bin/ibmot/timesedillib1850.htm.

Þorgrímur Þráinsson heimsækir 10. bekkina

Þorgrímur Þráinsson rithöfundur heimsótti okkur í apríl og hélt fyrirlestur fyrir 10.bekkina sem bar yfirskriftina „Eltu drauminn þinn“.  Hann ræddi m.a. við þau um mikilvægi þess að setja sér markmið, hafa trú á sjálfum sér til að ná markmiðunum og skipuleggja sig í samræmi við það.   Þorgrímur náði vel til krakkanna og voru allir mjög ánægðir með það sem hann hafði fram að færa.

Hann gaf sér líka tíma til að spjalla við 8.bekkina þar sem þau voru að ljúka við að lesa bókina hans Tár bros og takkaskórí bókmenntum.